1948 නිදහසෙන් පසු අප බොහෝ දෙනෙක් බලා සිටිනුයේ රජයන් විසින් තම නිවසටම නිකන් ලබා දෙනු ලබන සහනාධාර පත්‍රිකා දෙසය. එසේ ලබා දුන්නද තමන්ගේගේ විවිධවූ ප්‍රශ්ණ හා ගැටළු වලට විසදුම් සොයා ධනාත්මක ආකල්පමය වර්ධනයෙන් තම පවුලේ විවිධ වූ සම්පත් උපයෝගී කරගෙන දුප්පත් කමින් මිදීමට තම වටා ඇති රාජ්‍ය රාජ්‍ය නොවන සම්පත් උපයෝගී කරගන්නේද ඉතාම සුළු පිරිසකි.
බොහෝ දෙනෙක් තම බඩ වියත පමණක් රැක ගැනීම සදහා විවිධ වූ ආයතන වලින් සහනාධාර සොයා යන මොහොතක සමෘද්ධියේ දැක්ම යථාර්තයක් කිරිමට සමෘද්ධියේ මෙහෙවරවූ සහභාගිත්ව සංවර්ධන ක්‍රමවේදය භාවිතා කරමින් දිවියෙන් ජයගන්නා වු දිරිය කතුන් සමෘද්ධි ගමනට හමුවූයේ මැදිරිගිරිය මණ්ඩලගිරිය සමෘද්ධී කලාපයේ 97 වෙඩිකච්චිය ග්‍රාම නිලධාරී වසම තුලදීය... පලමුවෙන්ම ගමනට හමුවූයේ අංක 185 සමගිපුර පදිංචි ඊ.ජි. චන්ද්‍රාවතී මහත්මියයි.. තම ස්වාමියා කුලී වැඩ කරමින් තමා සහ තම දරුවන් පෝෂණය කරමින් සිටින අවස්ථාවේදී රු.420/- සමෘද්ධි සහනාධාරයක් ලැබ සමෘද්ධි වැඩසටහනට සම්බන්ධ වූ ඇය අදයට අසල්වැසියෙකුගෙන් දේශිය ගව දෙනෙකු ලබාගෙන කිරිගව පාලනයට මුලපුරා ඇත. ස්වාමියා කුලී වැඩ කරන ගමන් කිරිගව පාලනයද ස්වාමියාට පවරූ ඇය සමෘද්ධි වැඩසටහනින් ජුකී මැෂිමක් ලබාගත්තේ තමා රෙදි මැසීමට දන්නා බැවින් හා තමා නිවසේ නිකරුනේ කාලය ගෙවීම පවුලේ ආර්ථිකයට ඔරොත්තු නොදෙන බැවිනි. මේ වන විට ඇදුම් මැසීමෙන් මාසෙකට රුපියල් 10000/-ක් 15000/-ක් පමණ ඇය අතිරේක ආධායමක් ලබා ගන්නා බව ඉතා සතුටින් ඇය ප්‍රකාශකර සිටියාය.
2015 වර්ෂයේදී සමෘද්ධි ජීවනෝපාය සංවර්ධන වැඩසටහනේ චක්‍රීය ණය වැඩසටහනට සම්බන්ද වී ඇත්තේ එවකට සේවය කල සමෘද්ධි සංවර්ධන නිලධාරී එම්.ජී. අතුල සිරි කුමාර මහතාගේ මග පෙන්වීමෙනි. එමගින් රුපියල් 50000/-ක ණය මුදලක් හා තමා ලග ඉතිරි කරගත් මුදල්ද යොදවා තමාටම කිරි ගවයෙක් මිලදී ගත් ඇය මේ වන විට තමාගේම කිරි ගවයින් 10 දෙනෙකුගේ අයිතිකරුවෙකි. කිරි ලබා දෙන දෙනුන් දෙදෙනෙකු පමණක් අද වන විට සිටින බැවින් එම දෙනුන්ගෙන් දිනකට කිරි ලිටර් 15 පමණ ලබා ගන්නා බවත් කිරි ලීටරය රුපියල් 65/=, 67/=ට අලෙවි කරන බවද, ඉදිරියේදී අනෙකුත් දෙනුන්ද ගැබ්බර වීමෙන් මෙය වැඩිවන බවත්, පැවසූ චන්ද්‍රාවතී මහත්මිය කිරි ශිතකරණයක් තිබීමෙන් ඇය සමග සිටින තවත් 20 දෙනෙක් පමණවූ හිතවත් අයගේ දෙනුන්ගෙන් සවස කිරි ලබාගෙන මෙම ආධායම දෙගුණ කරගතහැකි බව පවසයි... මෙම ගමනට සහභාගිත්ව සංවර්ධන ක්‍රමවේදය තුල මැදිරිගිරිය මහවැලි සංවර්ධන අධිකාරිය විශාල දායකත්වයක් ලබා දුන්බව ඇය පැවසූවේ ඉබින්න දුන්න අත කිසිදා සපානොකන්න යන වදන ගමනට සිහිපත් වීමෙනි.
මහවැලි සංවර්ධන අධිකාරියේ ධම්මිකා මහත්මිය, ස්වදේශිකා මහත්මිය, අනුරුද්ධ මහතා සහ ප්‍රධාන නිලධාරීතුමා ඇතුළු පිරිස තම දිළිදු බවින් මිදිම සදහා ගවගාල සදහා රුපියල් 50000/=ක්, කිරිගවයෙකු සදහා රුපියල් 40000/-ක්, තණකොළ කැබලි කරන මැෂිම සදහා රුපියල් 40000/=ක්, ප්‍රධානයන් වශයෙන් ලබාදුන් බවත්, 9% වාර්ෂික පොළිය මත රුපියල් 100000/=ක ණය මුදලක් දී කිරිගව පාලනය සදහා උනන්දු කල බව බවසන ඇය කිරි දෙනුන් 20ක් ඇතිකර දිනකට කිරි ලීටර් 100ක් ඉදිරි අපේක්ෂාව බවද වැඩිදුරටත් ඇය කියා සිටියේය. තමාගේ පවුලේ කාලය තවත් ඉතිරිවී ඇති බැවින් 2017 වර්ෂයේදී මහවැලි අධිකාරිය මගින් ඕකිඩි සහ ඇන්තූරියම් මල්පැල වගාව කරගෙන යෑම සදහා රුපියල් 50000/-ක් වටිනා මල් ගෙයක් ( නෙට් හවුස් ) අනුමත වී ඇති බවත් ඒ සදහාද අවශ්‍ය කටයතු කරගෙන යන බව එතුමිය සදහන් කරන ලදි....
දිළිදුකමින් මිදිමට සමෘද්ධි සහනාධාර දීමනා පත්‍ර අනවශ්‍ය බවත් උනන්දුව උත්සාහය කැපවීම තිබේනම් ඉදිරි ඉලක්ක අභියෝග ජයගතහැකි බව පවසන චන්ද්‍රාවති මහත්මිය යමක් ලගට දෙනතුරු නොසිට විවිධවූ සම්පත් සොයා ගොස් එක් දෙයකට එක් ආයතනයකට සීමානොවී පටු ආකල්ප වලින් බැහැර වීමෙන් පවුලේ මෙන්ම රටේ ආර්ථිකයටද දායක වියහැකි බව පැවසූවේ මහත් අභිමානයෙනි... අවසන් වශයෙන් සහයෝගය දුන් සියළු නිලධාරින්ට ස්තූතිය පුදකිරිමට එතුමිය අමතක කලේ නැත.
චන්ද්‍රාවති මහත්මිය සමගිපුරට පමණක් නොව රටටම චන්ද්‍රාවක් වෙනු ඇතැයි සමෘද්ධි ගමනද අපේක්ෂා කරන්නෙමු...
එම්.පි.ඩබ්. මල්කාන්ති දිසානායක
සමෘද්ධි ගමන සංනිවේදක
මැදිරිගිරිය
